Оның айтуынша, ағымдағы жылдың 23-29 қазаны аралығында республикада ЖРВИ-дің 119 792 жағдайы тіркелді, өткен аптамен салыстырғанда сырқаттанушылық 25,8%-ға төмендеді.
«Министрлік тұмау мен басқа да тұмауға жатпайтын вирустардың айналымына мониторинг жүргізіп отырады. Маусым басталғаннан бері тұмауға 2543 үлгі зерттелді, тұмау вирусы анықталған жоқ. Оң нәтижелердің негізгі үлесін риновирустар, бокавирустар, РС вирустары, аденовирустар, парагрипп құрайды», - деп хабарлады вице-министр.
Ол бүгінде тұмау ауруының алдын алудың ең тиімді әдісі вакцинация екенін атап көрсетті.
«Қауіпсіз және тиімді вакциналар қолжетімді және олар 60 жылдан астам қолданылып келеді. Ағымдағы жылы бюджет қаражатына 2,2 млрд теңге сомасына Ресейде шығарылған вакцинасының 2 млн 414 мың дозасы сатып алынды. Вакцина құрамында алдағы маусымда болатын штаммға қарсы штаммдар бар. Бұл республика халқының 12%-ын қамтуға мүмкіндік береді, ДДҰ ұсынған көрсеткіш – кемінде 10%», - деп мәлім етті Айжан Есмағамбетова.
Оның дерегіне сәйкес, бүгінгі таңда 1 млн 516 мың адам егілді.
«Республикада коронавирус инфекциясы бойынша эпидемиологиялық жағдай тұрақты. Өткен жылдың осындай кезеңімен салыстырғанда COVID-19-бен сырқаттанушылық 35 есе төмен. Ағымдағы жылдың қазан айында 300-ге жуық жағдай тіркелді, бұл қыркүйектегі көрсеткіштен 1,7 есе төмен», - деп хабарлады Денсаулық сақтау вице-министрі.
