«Атамекен» ҰКП медициналық қызметтер департаментінің директоры Назгүл Қабдрахманованың айтуынша, дәрілік заттар мен медициналық бұйымдарды өндіру үшін этил спиртіне акцизді енгізу құрамында спирті бар отандық өнім бағасының 30-100%-ға өсуіне алып келеді. Атап айтқанда, йод, зеленка, ротокан, корвалол, меновазин, валериан, қырмызыгүл тұнбалары сияқты бірінші кезектегі препараттар қымбаттайды. Мысалы, долана тұнбасының 100 мл-ге бағасы өндірушіден 191 теңгеден 395 теңгеге дейін өсуі мүмкін.

Отандық өндірушілер де дабыл қағып жатыр. Олардың айтуынша, этил спиртіне акциз енгізу құрамында спирті бар отандық өнімдерді Қазақстан нарығынан ығыстыруға әкеледі, Соның салдарынан өндірістік қуаттылық төмендейді, қызметкерлердің саны қысқарады.

«Этанолды сатып алуға акцизді қосу өнімдеріміздің 80%-ға қымбаттауына алып келеді. Тиісінше, алкогольге акциз салынбайтын Беларусь және Ресей елдерінің өнімдерімен салыстырғанда бірден бәсекеге қабілетсізбіз боламыз. Бұл елдер онсыз да Қазақстан нарығында үстем жағдайда. Бәсекеге қабілетсіз баға өндірістің қысқаруына немесе банкроттыққа әкелуі мүмкін. Қазір компаниямызда 80 қызметкер жұмыс істейді. Біз персоналдың жартысын қысқартуға мәжбүр боламыз, өйткені этил спирті негізіндегі дезинфекциялау құралдары өндірісіміздің жалпы көлемінің 70%-ын құрайды», – дейді «БО-НА» ЖШС директоры Нұрлан Ережепов.

«Фармация 2010» ЖШС директоры Серік Қуанышев те әріптесін қолдады. Кәсіпкер қазіргі кезде ЖШС өндірісінде 100-ден 140-қа дейін жұмысшы тартылғанын атап өтті. Кәсіпорын әр қызметкер үшін салықтың 9 түрін төлейді. Өндіріс тоқтаған жағдайда қызметкерлер жұмыссыз қалады, ал бюджет ақша алмайды.

«Қазақстан ФарМедМндустриясы» фармацевтикалық және медициналық өнімдерді өндірушілер қауымдастығының атқарушы директоры Гүлдария Манақбаева құрамында спирті бар өнімдердің қымбаттауы медициналық ұйымдардың сатып алуына да әсер ететінін атап өтті.

«ТМККК шеңберінде құрамында спирті бар дәрілік заттар мен медициналық бұйымдардың 30-ға жуық атауы жеткізіледі. Бұл йод, салицил спирті, повидон йоды, этанол және т.б. Осы өнімдерге акцизді енгізу сатып алу шеңберіндегі бағаға әсер етеді. Құн өскен жағдайда мемлекеттің осы препараттарды сатып алмауы қаупі туындайды. Ауруханалар осы өнімдерге қол жеткізе алмай қалады», – деді спикер.

Айта кету керек, бұл норма Салық кодексіне 2022 жылдың желтоқсанында қабылданды. Оның енгізілуі фармацевтика саласының өкілдерімен талқыланбады.