Тіркелген дәрі – дәрмектердің ішінде рецепт бойынша-5401 (75%), ал қалған 1755 зат (25%) рецептсіз сатылады.
ҚР Дәрілік заттардың мемлекеттік тізіліміне Беларусь, Германия, Израиль, АҚШ, Ресей, Түркия, Корея, Жапония, Үндістан, Швейцария, Қытай және басқа елдердің препараттары кіреді.
Қазақстанда барлық дәрілік заттар дәріхана сөрелеріне түсер алдында сапасына, қауіпсіздігіне және тиімділігіне міндетті сараптамадан өтеді. Кешенді бағалауды Дәрілік заттар мен медициналық бұйымдарды сараптаудың ұлттық орталығының сарапшылары жүргізеді (ДЗМБСҰО). ДЗМБСҰО сарапшылары құжаттарды мұқият талдайды, клиникалық және клиникаға дейінгі зерттеулер бойынша деректерді зерттейді, зертханалық зерттеулер жүргізеді.
Сараптама үш кезеңнен тұрады: бастапқы сараптама, мамандандырылған сараптама және зертханалық сынақтар.
Ұлттық орталық сараптаманың барлық кезеңдерін өткізгеннен кейін қорытынды береді. Осы қорытындының негізінде Медициналық және фармацевтикалық бақылау комитеті тіркеу куәлігін, яғни Қазақстан Республикасының аумағында өткізуге рұқсат береді.
Осыған қарамастан, Қазақстанда дәрі-дәрмектерге тұрақты фармакологиялық қадағалау және оларды қолдану кезеңінде медициналық бұйымдарға мониторинг жүргізіледі, яғни препараттар мен медициналық бұйымдардың сапасын талдау және бағалау бүкіл өмірлік циклде жүзеге асырылады. Бұл жұмысты Комитет Ұлттық орталықпен бірлесіп орындайды.
Дәрі-дәрмектерге жағымсыз реакциялар пайда болған немесе олардың терапиялық әсері болмаған жағдайда, жағымсыз реакциялар туралы хабарлама картасын қалыптастыру үшін фармацевтке немесе емдеуші дәрігерге жүгіну керек.
Естеріңізге сала кетейік, хабарлама картасын DariKZ мобильді қосымшасының көмегімен жіберуге болады. Бұл ретте хабарламада әрбір нақты жағдайға барынша талдау жүргізу үшін қажетті деректерді сипаттау маңызды.
Айта кетейік, Комитет ДЗМБСҰО қорытындылары негізінде қажет болған жағдайда дәрілік препаратты қолдануды шектейді, маркетингті тоқтатады, нарықтан кері қайтарып алады және препаратты Қазақстанда өндіруге, таратуға және қолдануға тыйым салады.
